~! || உடல் || உள்ளம் || உயிர் || உலகம் உரசும் நாற்சந்தி >> || || || || << !~ :) தமிழ்ப் பிழைகளின் தலைமையகம் :) எத்தனை குறைகள், எத்தனை பிழைகள், எத்தனை அடியேன், எத்தனை செய்தால், பெற்றவன் நீ குரு பொறுத்தருள்வது உன் கடன்!!!

Archive for the ‘சுதந்திரம்’ Category

சொன்னால் நம்பமாட்டீர்கள் – சின்ன அண்ணாமலை

நாற்சந்தி கூவல் – ௧௦௨(102)
(புத்தகப் பரிந்துரை)

பன்முகம் கொண்ட பண்பாளர்களை (பற்றி) வாசிப்பது ஒரு சுகானுபவம். 1900களின் காலக்கட்டத்தில் இத்தகு மேதமை கொண்ட மனிதர்கள் பல இருந்தனர் என்று நான் எண்ணமிடுவதுண்டு. சின்ன அண்ணாமலையும் அந்த பட்டியலில் பெருமையுடன் சேர்கிறார்.

யார் இவர்? அரசியல்வாதியா? நகைசுவை ததும்ப உரையாற்றும் பேச்சாளரா? காங்கிரஸ் தொண்டரா? கல்கி விசிறியா? ராஜாஜி பக்தரா? எம்.ஜி.ஆர் அண்ணாவின் அன்பு தோழரா? எழுத்தாளரா? காந்தியவாதியா? மா.பொ.சி-யின் நண்பரா? பத்திப்பாளரா? சுதந்திர போராட்ட வீரரா? திரைப்பட தாயாரிப்பாளரா வசனக்கர்த்தாவா? இன்னும் இன்னும் என்னவென்று அடுக்க முயாத அளவு கீர்த்திகளை கொண்ட எளியவர், தமிழன்பர்.

chinna annamalai with rajaji

சுயசரியதை மாதிரியான புத்தகம் தான், ஆனால் அத்தனை சுவையாக உள்ளது. நறுக்கென எழுதி, களுக்குக்கென சிரிக்க வைக்கிறார். வரிசையாக படிக்க வேண்டிய அவசியம் இல்ல, ஊருகாய் போல அங்கு அங்கு தொட்டு ருசிக்கலாம், பின்னர் முழுவதும் ரசிக்கலாம். தெளிந்த நீரோடை போன்ற எண்ணங்கள், அதில் பாய்ந்து வரும் ஜலமென வேக நடை.

வரலாறு என்றுமே பாரபட்சம் மிகுந்தது. அதுவும் நம் சுதந்தரக் கதை மேற்கத்திய மாநிலங்களின் ஆதிக்கத்துடன் எழுத்தப்பட்டுள்ளன எனபது சொல்லப்படாத உண்மை. அதை மட்டுமே நாம் வாசித்து, பேசி, விவாதித்து, பாராட்டி வருகிறோம் என்பதில் தான் எனக்கு அதீத வருத்தம்.

சின்ன அண்ணாமலை பற்றி உங்களில் எத்தனை பேருக்கு தெரியும் ? ஆங்கில அரசு இவரை நல்லிரவில் கைது செய்து, திவாடானை சிறைச்சாலையில் வைத்தது. காரணம் 144 தடை உத்தரவை மீறி கூட்டம் போட்டது, பேசியது. இதில் என்ன பெரிய விஷயம் இருக்கிறது ? அதற்கு பின் நடந்த சம்பவங்கள் தான் முக்கியத்துவம் வாய்ந்தவை.

கலையில் இந்த செய்தியை அறிந்த மக்கள், தேவக்கோடையிலிருந்து ஊர்வலமாக திரண்டு சென்று, சிறையை உடைந்து, தீவைத்து, இவரை விடுதலை செய்தது. இவர்கள் எல்லோரும் இரவு திரும்ப வரும் வழியில், பிரிட்டிஷ் காவல் துறையினர் துப்பாக்கி சூடு நடத்தினர், பல நூறு பேர் இறந்தனர்,  காயமடைந்தனர், உதவ ஆள்லில்லாமல் துடிதுடித்து செத்தனர். கையில் குண்டடியுடன் சின்ன அண்ணாமலை அதிஷ்டவசமாக தப்பித்தார். தேசத்தில் இது போல, ஒரு சம்பவம் இதற்கு முன் நடந்ததேயில்லை ! (காந்தியே இதைக் கேட்டு ஆச்சிரியப்பட்டு, அவரை பாராட்டினார் என்றால் பார்த்துக் கொள்ளுங்கள்)

இப்படி பட்ட “சொன்னால் நம்ப முடியாத” அதிசயங்கள் பல இவர் வாழிவில் நடந்துள்ளது. குமுதம் இதழில் தொடராக எழுதியுள்ளார். பின்னர் புத்தக வடிவம் கொண்டுள்ளது.

இந்த புத்தகத்தை நீங்கள் ஏன் படிக்க வேண்டும் ? மிக முக்கியமான காரணாம், தமிழகத்தில் தி.மு.க அல்லது திராவிட கட்சிகள் எப்படி ஸ்திரம் கொண்டது, காங்கிரெஸ் எப்போது வீழ்ந்தது ? காரணம் என்ன ? கர்த்தாக்கள் யார் ? அதன் ஆயுள் மிகுந்த ஆட்சியின் தோல்வி எப்படி சாத்தியமானது ? என்பதை போகிற போக்கில், எளிமையா, உள்ளது உள்ளபடி சொல்லி செல்கிறார் சின்ன அண்ணாமலை. இவை அனைத்தையும் அவர் நேரில் இருந்து பார்த்து, அனுபவித்து எழுதியுள்ளார்.

நான் உன்னிப்பாக கவனித்த ஒரு விஷயம்: 1950களில் இருந்த அரசியல் தலைவர்களின் பாராட்ட மிகுந்த பண்புகள். எத்தனை தான் அரசியல் கொள்கைளில் சண்டைகள் இருந்தாலும், தேர்தலில் போட்டிகள் இருந்தாலும், தாக்கி வீழ்த்தி மேடைகளில் பேசினாலும், பரஸ்பர நட்பும், அன்பும், மரியாதையும் கொண்டிருந்தனர். தனிப்பட்ட துவேஷம் அறவே இல்லை என்றே சொல்லலாம்.

தமிழிசை, செழுமை பெற்ற காலத்தின் கதை, இந்த புத்தகத்தில் உள்ளது. தேவக்கோட்டையில் இரண்டாம் தமிழிசை மாநாடு நடத்திய பெருமை இவருக்கு உண்டு. தமிழ் பண்ணை – என்னும் பதிப்பகத்தின் மூலம் பல நல்ல தமிழ் அறிஞர்களின் இலக்கியங்களை செம்பதிப்புகளாக வெளியிட்டுள்ளார். குறிப்பாக சொல்ல வேண்டுமென்றால், இவர் வெளியிட்ட கட்டபொம்மன் மற்றும் கப்பலோட்டிய தமிழன் புத்தகங்கள் மிகவும் பிரசித்தம் வாய்ந்தவை. இதன் திரைப்படங்கள் வெளிவரவும் இவரே காரணமாக இருந்துள்ளார்.

மலைக்கள்ளன் படம் வெளிவர அறிஞர் அண்ணா தான் தூண்டுகோலாக இருந்துள்ளார் என்ற சம்பவத்தை படிக்கும் போது மிகுந்த மகிழ்ச்சி அடைத்தேன். போதும் மீதியை நீங்களே வாசித்து இன்புறவும்.

எனக்கு மிகவும் பிடித்திருந்தது, புத்தகத்தின் கடைசி அத்தியாயம் தான்! அதன் தலைப்பு “நானும் எழுத்தாளனானேன்!”. இப்போது நினைத்தாலும் சிரிப்பு முட்டுக் கொண்டு வருகிறது.

நிகழ்கால வந்தியதேவன் என்ற பட்டத்தை இவருக்கு தரலாம் என்று நினைக்கிறேன், இவரின் ஆளுமைக்கும் திறனுக்கும் இது சாலப்பொருத்தமானது. எத்தனை எத்தனை அரும் பெரும் காரியங்களை செய்துள்ளார்! எவ்வளவோ பெரும் மனிதர்களுடன் நட்புக் கொண்டுள்ளார்! வாசித்து விட்டு, வந்து சொல்லுங்கள், இவரை வந்தியத்தேவன் என்று அழைப்பது சரிதானாவென்று !

பி.கு : சின்ன அண்ணாமலையின் “சொன்னால் நம்பமாட்டீர்கள்” நாட்டுமையாக்கப்பட்ட நூல். பதிவிறக்கம் செய்ய சொடுக்கவும் – தமிழ் இணையக் கல்விக்கழக நூலகம். மின்னல் வேகத்தில் நானே படித்து முடித்தேன், உங்களைப் பற்றி சொல்லவா வேணும்!

Advertisements

சுவாமிஜியும் நேதாஜியும்

நாற்சந்தி கூவல் – ௯௨(92)
(சுதந்திர தின சிறப்பு பதிவு மற்றும் புத்தகப்பதிவு)

♦♠♠♠♠♠♠♠♦

நொந்தே போயினும்,
வெந்தே மாயினும்
ந்தேசத்தவர் உவந்தே
சொல்வது – வந்தே மாதரம் !! 

பாரதியின் வரிகளுடன், சுதந்திர தின நல்வாழ்த்துகள். அறுபத்தி ஆறு ஆண்டுகள் ஆகிவிட்டன. இதே தருணத்தில் அந்த நாளில் இந்தியா தனது சுதந்திரத்தை ஆங்கிலேய அரசிடம் இருந்து (மட்டும்) பெற்றது. வளர்ச்சி என்பது எங்கும் வியாபித்து இருந்தாலும், மோகங்களின் வீழ்ச்சி வாசலின் வாய் பிளந்துக் கொண்டே செல்கிறது.

ind

கொடியை சட்டையில் குத்திய சந்தாமாமாக்களும். சுந்தர பாண்டியர்களும், நீ தானே என் பொன் வசந்தம் என இனிய கீதம் இசைத்து கடலில் வத்திக்குச்சியாக மூழ்கி கரையும் நாள் இதோ இனிதே விடிந்தது. பாரதி அன்றே சொன்னான், அழகே சொன்னான் என்று மடியும் எங்கள் அடிமையின் மோகம்?“

விடுதலை என்பது யாது ? என்று நம் வீர துறவி விவேகானந்தர் சொல்கிறார் -> விடுதலை என்பது ஆன்மாவின் கீதம். தனி மனிதனின் அளவில் இது பொருந்தும், தேசிய அளவில் விடுதலை என்னும் சொல்லுக்கு எண்ணிலடங்கா அர்த்தங்கள் உள்ளன. இந்தியாவின் ஆங்கிலேய விடுதலைக்கு பாடுப்பட்ட அனைவரும் விவேகனந்தரின் அடி பணிந்து, அவரை படித்து, சிந்தித்து, செயல் படுத்தியவர்களே. அவரால் ஈர்க்கபட்டவர்களின் பட்டியல் மிகவும் நீளமானது : காந்தி, நேரு, சுபாஷ் சந்திர போஸ், பாரதி, ராஜாஜி ++++

மனிதரை உருவாக்குவது தான் என் நோக்கம் என்பார் சுவாமிஜி. அவர் ஸ்தாபித்த ஸ்ரீ ராமகிருஷ்ண மடத்தின் அடிநாதம் ஆத்மநோ மோக்ஷாத், ஜகத் ஹிதாயச: “. அதன் தமிழாக்கம், மக்களுக்கு சேவை செய்வதின் மூலமே ஒருவன் தனது சொந்த வீடுபேற்றை அடைய முடியும். இதுவே கலியுகத்தின் எளிய முக்தி மார்கமாகும்.

இப்படி மக்களுக்கு என்றே வாழ்ந்து, தங்கள் மோட்சத்தை அடைந்து, காலத்தின் சுவடுகளில் திடமான தடம் பதித்த பல வீரர்களுள் சுபாஷ் சந்திர போஸ் ஒரு விடிவெள்ளி. நேதாஜி என்றாலே வீரம் நெஞ்சில் பாயும். எப்படியும் சுதந்திரம் பெற்று விட வேண்டும் என்பதற்காக என்ன என்னவோ முயற்சிகள் செய்தார். அவரை பற்றிய ஒரு சிறு புத்தகம் படித்து முடித்தேன்.

நூலின் பெயர் : சுவாமிஜியும் நேதாஜியும்
பதிப்பகம் : சென்னை ஸ்ரீ ராமகிருஷ்ண மடம்
தமிழில் : சாருகேசி
பக்கங்கள் : 130
விலை : ரூ.25

சுவாமி விவேகனந்தரின் 150ஆவது ஜெயந்தி விழாவின் ஒரு அங்கமாக இந்த புத்தகம் தமிழில் மொழியாக்கம் செய்து வெளிவந்துள்ளது. மிகவும் சரளமான நடையில் நேதாஜியின் சிறு வாழ்க்கை குறிப்பு இப்புத்தகம், என்றே சொல்லலாம். சுவாமிஜியால் அவர் எப்படி எல்லாம் ஈர்க்கப் பட்டார் என்று அவரின் கடிதங்கள், உரைகள் மூலம் இந்த புத்தம் பேசுகிறது.

நேதாஜியின் சிறு வாழ்க்கை குறிப்பு ( நான் அறிந்த பட்சத்தில்) தனது பதின் பருவத்தில் மிகுந்த ஆன்மீக நாட்டம் கொண்டவர் சுபாஷ். வீட்டை விட்டு ஓடி சென்று சில வருடங்கள் இமைய மலை சாரல்களில் தனது குருவை தேடினார். பின்னர் வீடு திரும்பி, லண்டன் சென்று, மூன்றே மாதத்தில் ICS தேர்வில் மூன்றாம் இடம் பிடித்தார், அது இன்றைய IAS தேர்வைப் போன்றது, மிகவும் கடினமானது. பிரிட்டிஷ் அரசு வழங்கிய உயரிய வேலைகளை துறந்து, சேவை செய்ய சொந்த ஊர் கல்கத்தா வந்தார். தேசபந்து தலைமையில் கலக்கத்தா மேயர் பதவி. மக்கள் செல்வாக்கினால், அகில இந்திய காங்கிரஸ் தலைவராக உயர்ந்தார். இவரை முஸ்லிம் மக்களும் மிகவும் நேசித்தனர் என்பதை நாம் மறக்கக்கூடாது

பின்பு காங்கிரஸ் கட்சியிலிருந்து காந்தியினால் வெளியேறி, Forward Block கட்சி ஆரம்பித்தார். வீட்டிலேயே சிறைப்பட்டார். தப்பி ஆப்கானிஸ்தான் சென்றார். அவரின் வாழ்கையை எழுதிய ஒரு ஆங்கில ஆசிரியர் சொல்கிறார் … He shaked his hands with the devil, for the one and only wish : his nations freedom….” ஹிட்லர் சந்திப்பை பற்றிய குறிப்பு இது. ஸ்டாலினை சந்தித்தார், இந்தியாவை மீட்க உதவி கோரினார்.

independence-day-50a

நீர் மூழ்கி கப்பல் மூலம் உயிரையே பணையம் வைத்து ஜப்பான் சென்றார். சித்தரஞ்சன் தாஸ் உதவியுடன் இந்திய அகதிகளை, கைதிகளைக் கொண்டு இந்தியாவை மீட்க படை அமைத்தார். சிங்கப்பூரில் டாக்டர் லக்ஷ்மி செஹால் தலைமையில் முதல் பெண்கள் படை உருவானது. பலம், பலத்தை தான் உபனிஷத்துக்கள் கூறுகின்றன என்பது சுவாமிஜியின் ஆழ்ந்த நம்பிக்கை. இதை செயலில் காட்டியது இந்தப் படை.

AZAD HIND என்று முதல் முதலில் இந்திய அரசாங்கம் ஆரம்பித்து, அதற்கு மந்திரி பிரதானிகள் அமைத்து, நிதி திரட்டி, புதிய தேசத்தின் பலதரப்பட்ட வளர்ச்சிக்காக பாடுப்பட்டார். Exile governmentடை முற்காலத்தில் முதன் முதலில் அமலுக்கு கொண்டு வந்தவர் தான் ஸ்ரீ ராமர் : சுக்கிரீவனுக்கு, வாலி இருக்கும் போதே பட்டம் கட்டியது. விபீஷணனுக்கு, இராவணன் இருக்கும் போதே மன்னன் பட்டம் கட்டி, கடல் நீரினால் மகுடாபிஷேகம் செய்தார் . காலம் தொட்டு நடத்து வரும் செயல் இது. ஆசாத் ஹிந்த் – Indian Government In exile.

அந்த அரசாங்கம் அச்சு பதிப்பித்த ரூபாய் நோட்டுகளில் இருந்த வீர வாசகம் : நீ எனக்கு ரத்தத்தை கொடு , நான் உனக்கு சுதந்திரம் தருகிறேன் ! – நேதாஜி. அஸாம் வரை Indian National Army (INA) வந்து போராடியது. இதற்கு தேவையான பல உதவிகளை ஜப்பான் அரசாங்கம் செய்தது. “நம்மில் ஒற்றுமை நீங்கின் அனைவருக்கும் சாவுஎன்பான் பாரதி. அஸாம் மாநிலத்தில் இதுவே நடந்தது, INAவில் இருந்த பலர் பிரிட்டிஷ் போலிஸ்ஸுடன் சேர்ந்து நமக்கே வீழ்ச்சி தந்தார்கள். இரண்டாம் உலகப்போர் நடந்த சமயம் அது. அணு குண்டுகளால் ஜப்பான் முழுவதும் நொறுங்கிப் போனது. நமக்கு இருந்த துணையும் இறந்தது. அஸாம் யுத்தம் நின்றது. கேப்டன் பிரேம் குமார் சஹால் மற்றும் சகோக்கள் சிலர் பிரிட்டிஷ் அரசிடம் வேண்டும் என்றே சிறைப்பட்டனர். அவர்களால் தான் இந்த INAவின் முழு விபரங்களை நாம் அறிய முடிந்தது. இதற்கு பிறகு நேதாஜி, ஜெர்மனி மார்கத்தில் செல்லும் போது இறந்தார் என்று கட்டு கதையுடன் அவரது வாழ்க்கை, வரலாறு என்னும் பட்சத்தில் முடிகிறது. ஆனால் அவர் அந்த விபத்தில் இறக்க வில்லை என்பது உறுதியான தகவல்.

சுபாஷ் போஸ் எழுதுகிறார், ‘சுவாமிஜி இரு விஷயங்களுக்கு முக்கியத்துவம் கொடுப்பார் தியாகம் மற்றும் நற்பண்புகளை வளர்த்தல்; தியாகம் இல்லாமல் எதுவும் இல்லை.’ இதற்கு தகுந்தாற் போல் தன் வாழ்க்கையையும் அமைத்துக் கொண்டார்.

நேதாஜி மிகமிக செறிவான, விரிவனா ஆளுமை மிக்கவர். சிறந்த பேச்சாளர். தலைமைப் பண்பு மிக்கவர். ஆழ்ந்து சிந்திக்கும் திறன் கொண்டவர். ஆங்கிலத்தில் புலமை மிக்கவர். வியக்க வைக்கும் எழுத்து திறம் கொண்டவர், அவர் எழுதிய இந்திய போராட்டம் (1933) அந்த காலகட்டதின் சுதந்திர போராட்ட முயற்சிகள் பற்றி தெளிவாக பேசுகிறது. இது நிற்க.

vivekananda quote 3

இந்த புத்தகத்தை பற்றி தினமணி கலாரசிகன் ஜூன் 23 இதழில் எழுதியது

…… இந்திய விடுதலைப் போராட்டத்திற்குத் தலைமை வகித்த இரண்டு பெரிய தலைவர்கள் அண்ணல் மகாத்மா காந்தியும், “நேதாஜி’ சுபாஷ் சந்திரபோசும். இவர்கள் இருவருக்குமே வழிகாட்டியாக இருந்தவர் சுவாமி விவேகானந்தர்தான். அவர் விட்ட இடத்திலிருந்து இவர்கள் தொடர்ந்தார்கள் என்பதுதான் உண்மை. சுவாமி விவேகானந்தர் எப்படி, எந்த அளவுக்கு நேதாஜியில் பாதிப்பையும், அவரது அணுகுமுறையில் மாற்றத்தையும் ஏற்படுத்தினார் என்பதைத் தெளிவுபடுத்துகிறது சாருகேசி மொழிமாற்றம் செய்திருக்கும் இந்தப் புத்தகம் …..

கடைசிவரை, நேதாஜிக்குச் சோதனையான காலகட்டங்களில் எல்லாம் வழிகாட்டி வந்திருப்பது சுவாமி விவேகானந்தரின் போதனைகளும் உரைகளும் கட்டுரைகளும்தான் என்பது இந்தப் புத்தகத்திலிருந்து தெரிந்துகொள்ள முடிகிறது. அதிலும், நேதாஜி சுபாஷ் சந்திரபோஸ் கொல்கத்தா மேயராக இருந்தபோது ஜனவரி 10, 1931 அன்று, சுவாமி விவேகானந்தரின் 69-ஆவது பிறந்தநாள் விழாவின்போது, பேலூர் மடத்தின் எதிரே கங்கைக் கரையில் நடந்த பெரிய பொதுக்கூட்டத்தில் நிகழ்த்திய உரை, எந்த அளவுக்கு நேதாஜி, சுவாமிஜியால் கவரப்பட்டிருந்தார் என்பதை வெளிச்சம் போடுகிறது.

எல்லோரையும் விடவும் சுவாமிஜி மிகப்பெரும் ஆளுமை. அவரை பற்றி சுபாஷ் போஸ் எழுதியது :

அபரிமிதமான தியாகம், இடையறாத செயல்பாடு, அளவுகடந்த அன்பு, மிக உயர்ந்த ஞானம், தயக்கமின்றி வெளிப்படும் உணர்வுகள், ஈவு இரக்கம்இன்றி தாக்குதல், இவ்வளவு பண்புகள் இருந்தாலும் குழந்தை போன்று எளிமை. இவரே சுவாமி விவேகானந்தர்.

என்ன அழகாக ஆழமாக சுவாமிஜியைப் படித்து, புரிந்து, அறிந்து, நேசித்துள்ளர் சுபாஷ் பாபு. இந்த நூலின் இறுதியில் சுவாமிஜியின் எது உண்மையான தேச பக்தி ?என்பதன் பதில் சேரக்கப்பட்டுள்ளது. அதில், எந்த மகத்தான காரியம் செய்வதற்கும் அவசியமான மூன்று குணங்களை பற்றி சுவாமிஜியே கூறுகிறார் :

  • இதயப் பூர்வமான உணர்ச்சி
  • மலையையொத்த எதிர்ப்புகளை வெல்லுவதற்க்கான மன உறுதி
  • உண்மையான, தூய்மையான லட்சியத்தைக் கொண்ட சிந்தனை மற்றும் அதன் கண் பிறந்து வளரும் ஆற்றல்

வாழ்வில் சாதனை படைத்தவர்களின் சரித்திரம் சொல்லும் பாடமும் இதுவே.

ஓ வீரனே துணிவுகொள். நான் இந்தியன், ஒவ்வொரு இந்தியனும் என் சகோதரன்என்று கர்வத்துடன் சொல் சுவாமிஜி. தீர்க்க தரிசியான பாரதியின் வரிகளுடனேயே நிறைவு செய்கிறேன். (சுதந்திரம் வரும் முன்னமே எழுதப்பட்ட பாடல்)

நாம் இருக்கும் நாடு
நமதென்பதறிந்தோம் – இது 
நமக்கே உரிமையாம்
என்பதுணர்ந்தோம் !

பூமியில் எவர்க்கும் இனி
அடிமை செய்யோம் 
பரிபூரணனுக்கே அடிமை
செய்து வாழ்வோம் !

(ஆடுவோமே பள்ளு பாடுவோமே – ஆனந்த
சுதந்திரம் அடைந்து விட்டோமென்று !)

♦♠♠♠♠♠♠♠♦

இனிய சுதிந்திர தின நல்வாழ்த்துகள் !

இனிய சுதிந்திர தின நல்வாழ்த்துகள் !

வாஞ்சிநாதன்….

நாற்சந்தி கூவல் – ௬0(60)

(லிங்க் பதிவு)

வாஞ்சிநாதன்….

வணக்கம். உங்களை சந்தித்து பல நாட்கள் ஆகி விட்டது. என்ன செய்ய திங்கவும் தூங்கவுமே பாதி நேரம்  போய் விடுகிறது, இதில் இந்த பொல்லாத சோம்பேறித்தனம் வேற….. என் சொந்த (சோகக்) கதை இங்கு எதற்கு…. சரி, விஷயத்துக்கு வருவோம்.

மேலே சொன்ன இத்யாதி வேலைகள் போக, மிச்சம் கிட்டும் வேளைகளில், கையில் கிடைக்கும் எதையும் படிக்கும் கிறுக்கன் நான். (அந்த கடலை மடித்த பேப்பர் உள்பட). இந்த வகையில் இணையம் ஒரு வளரும் பொக்கிஷமாக உள்ளது. படிக்க படிக்க பல அருமையா பண்டங்கள தட்டுப்படுகின்றன. அதில் பலவன அரசில், மற்றும் சினிமா சார்ந்தவை என்பதை உங்களுக்கு  சொல்லி தான் தெரிய வேண்டுமா. இதையும் தாண்டி பல எழுச்சி மிக்க, சிந்திக்க வைக்கும் கட்டுரைகளும் உள்ளன, என்பதே நிதர்சனம். ஆனாலும்,  தமிழில் இது போன்றவை சற்று குறைவு தான்.

அந்த வகையில் எனக்கு மிகவும் பிடித்த தளம், நான் அடிக்கடி ஆர்வமுடன் சென்று பார்க்கும் தமிழ் தளம் “தமிழ் பேப்பர்“. இதை சிறப்பாக நடத்தி வரும் கிழக்கு பதிப்பகத்துக்கு என் பாராட்டுகள். அதன் ஆசிரியர் மருதனுக்கு, என் சிறப்பு வாழ்த்துகள்.

சில நாட்களுக்கு முன் தமிழ் பேப்பரில் ஒரு (பெரிய) கட்டுரை படித்தேன். அதனுடைய லிங்கை உங்களுடன் பகிர்ந்து கொள்ளவே இந்த பதிவு. 102 வருடங்களுக்கு முன் நடந்த ஒரு சம்பவத்தின் நிஜ படம். சுதந்திர போராட்டத்தில் தமிழர் செய்த வீர வேள்வி பற்றியது.  கண்டிப்பாக இதனை படியுங்கள். நேரம் இருந்தால் இந்த பதிவின் மீதியையும் படியுங்கள்.

ஆஷ் கொலை வழக்கு – பாகம் 1

ஆஷ் கொலை வழக்கு – பாகம் 2

Vanjinathan with his friends

ஏனோ இந்த இரண்டு கட்டுரைகளையும் படித்த உடன் ஒரு ஆத்ம திருப்தி ஏற்பட்டது. இதற்கான காரணம் விளங்கவில்லை. ஒரு வசாகனுக்கு கிடைக்கும் பரிசு இது தானோ….

என்றோ, எங்கோ, எத்தனையோ வருடங்களுக்கு முன் நடந்து ஒரு விஷயத்தை ,இவ்வளவு அழகாக விவரிக்க முடியமா? உங்கள் எழுத்தாளுமை அபாரம் திரு.S.P.சொக்கலிங்கம் அவர்களே. நீங்கள் ஒரு வழக்கறிஞர் என நான் நம்புகிறேன். இன்று முதல் உங்கள் வாசகர் வட்டத்தில் நானும் ஒருவன். உங்களுக்கு ஒரு அன்பு வேண்டுகோள்: இது போல சுதந்திரம் சார்ந்த, அரசியல் வழக்குகள் பல உள்ளன, எங்களுக்காக அதையும் (நேரம் கிடைக்கும் பொழுது) படித்து எழுதுங்கள். உங்கள் பணியும், எழுத்தும் மேலும் சிறக்க என் வாழ்த்துகள். (சொக்கலிங்கம் அவர்களின் சில படைப்புகள்)

கடந்த சில மாதங்களாக, சில நல்ல நூல்களின் வாயிலாக நேதாஜி சுபாஷ் சந்திர போஸ், காந்தி, நேரு, சாவர்கர், வி.வி.எஸ் ஐயர், வ.உ.சி  போன்றவர்களை பற்றி படித்து வருகிறேன். இவர்களை பற்றி ஒரு முழுமையான அறிமுக வரைபடத்தை தந்துள்ளது இந்த ‘ஆஷ் கொலை வழக்கு’. வாஞ்சிநாதனை பற்றி கேள்விப் பட்டுள்ளேன், ஆனால் இது போல விரிவாக படித்ததில்லை.  தொடர்ந்து படிக்க ஆசை.

அடுத்து வரும் பதிவுகளில் சுதந்திர மனம் கமலும் . அந்தமானில் சிறையில் சாவர்கர் இருந்து. பெல்லாரி சிறையில் வி.வி.எஸ்.ஐயர் எழுதிய கம்ப ராமாயண நூல். ச்விஸர்லாந்தில் சுபாஷ் போஸ். காங்கிரஸில் நேரு குடும்பம். காந்தியின் அரசியல் ராஜா தந்திரம். ஜின்னா என்னும் காந்தியின் எதிரி. இந்தியன் நேஷனல் ஆர்மி. ராஜாஜி என்னும் சக்கரவர்த்தி. சவர்கரும் கோட்சேவும்………………… போன்ற பல விஷியங்களை பற்றி பேசுவோம். இந்த துறையில் எனக்கும்  ஊக்கமூட்டி , புத்தங்களும் கொடுத்து படிக்க உதவும் மதுரை ராமாயண ராமமூர்த்தி ஐயா அவர்களுக்கு என் நன்றிகள்.

ஆனால் ஒன்று மட்டும் நிச்சியம். நான் எழுத்தும் அதே தமிழ் மொழியை கொண்டு தான் சொக்கலிங்கம்  அவர்களும் எழுதுயுள்ளார். ஆனால் என்ன ஒரு கோர்வை, நேர்த்தி, நடை மற்றும் செய்திகளை சரியாக அழகாக வருசையாக சொல்லும் திறன். ஒன்னு எனக்கு தமிழ் சரியா வரவில்லை. அல்லது தேர்ச்சி போதவில்லை. அல்லது எனக்கு அழகாக எழுத வராது போலும்….. என்னால் ஆனமட்டும் முயற்சி செய்து பார்க்கிறேன். தமிழ் தாய் தான் என் பிழைகளையும் பொறுத்து, என்னையும் காத்தருள வேண்டும். நீங்களும்தான்.

குருவாய் வருவாய் அருள்வாய் குகனே.

வந்தே மாதரம்! ஜெய் ஹிந்த்!!!

இந்தியன்,

ஒஜஸ்

குறிச்சொல் மேகம்

%d bloggers like this: